Strandryddeveka 2020

Som kanskje fleire har fått med seg, vart den tradisjonelle strandryddeveka, som er kvar vår, flytta til hausten på grunn av covid-19 pandemien. Men dette treng ikkje å bety at det blir rydda mindre avfall. Faktisk er hausten ei fantastisk tid å rydde på, då ein får rydda naturen for avfall som har hamna på avvege etter våren og sommaren. I tillegg unngår vi å forstyrre fuglar i den sårbare hekketida som er på vårparten. I tillegg har vi ein sjanse til å rydde nærområdet vårt før snøven bankar på døra og legg seg over gamle synder.

På Hold Norge Rent si side kan ein registrere ryddeaksjonar i den nye portalen "Rydde". Her finn du også oversikt over andre aksjonar i nærområdet du kan melde deg på, eller melde frå om områder som har mykje avfall. Ryddeutstyr får du utdelt hos VØR og Småjobbsentralen i Ørsta kommune. Om du leverer avfallet ditt på miljøstasjonen sjølv, må du hugse å oppgi aksjonskode, kvar du har rydda og kven du/organisasjonen er. 

Vi minner om at det framleis er viktig å ta omsyn til dei generelle krava om smittevern som til ei kvar tid blir gitt av styresmaktene. Vi har samla nokon råd som gir ein tryggast mogleg ryddeaksjon:

• Bruk hanskar og vask hendene grundig etter rydding.
• Hald ein meters avstand til andre som ikkje er i same hushald eller nær slekt.
• Unngå å rydde i store grupper der ein ikkje klarer å halde ein meters avstand frå kvarandre.
• Ikkje del pose eller avfallsekk med andre.
• Utnemn ein som er ansvarleg for å registrere namn og kontaktinformasjon, i tilfelle smittesporing blir naudsynt. Hugs at kontaktinformasjonen til deltakarar skal slettast etter 10 dagar.

Vi håper du blir med på dugnaden!