Asbest/eternitt

Av omsyn til det miljøfarlege støvet som kan vere kreftfarmkallande er det strenge reglar for levering/mottak.

Slik skal asbesten pakkast før levering:

• Bruk hanskar og maske
• Pakkast i 2-lags plast (tjukkelse 0,2 mm bygningsplast)
• Teipast godt igjen i alle kantar
• Merkast med “inneheld asbest”

Ved større mengder ønskjer vi dette levert på pallar, med plast under og over. Lasset bør ikkje vere meir enn 1 meter høgt. Ved mottak vil leveranse bli kontrollert av hjullastarsjåfør som også vil hjelpe å lesse av asbesten i konteiner. 

Ved mangelfull eller dårleg innpakking vil den som leverer bli vist vekk frå anlegget. Ny og forsvarleg innpakking må skje i eigen regi. Er du usikker, ta kontakt før levering.

Kvar abonnent har inkludert i gebyret sitt gratis levering av opptil 1000 kg farleg avfall kvart år.

NB! Avfall som vert levert frå container-selskap og firmabilar vert rekna som næringsavfall.

Asbestmaterial vart tidlegare brukt i bygningar og installasjonar frå rundt 1920 og fram til eit forbod mot bruk av asbest kom i 1985. Fleire bygningar har i ettertid blitt sanert for asbest, men det er framleis mykje asbestmaterial att i eldre bygningar. Spesielt vart asbest hyppig brukt etter andre verdskrig og materialet var godt kjent for sine fantastiske isolerande eigenskapar. Det finst ulike namn på material som inneheld asbest. Nokon av desse er kjent som eternitt, asbestolux, internitt og pernitt.

Asbest er krystallinske silikatmineral med fiberstruktur og er først helseskadeleg når asbestfiber eller støv blir frigjort frå materialet, anten gjennom at asbesten blir bearbeida eller skada. Frigjorte asbestfiber kan ved innånding gi større risiko for kreft og utgjer derfor ein helserisiko ved nærkontakt. Det er derfor strenge krav til korleis asbest skal sanerast, pakkast inn og leverast til godkjent avfallsmottak.

Asbest finst i blant anna harde bygg- og fasadeplater (eternitt), isolasjonsmateriale for røyr og kjeler, samt i vassrøyr og kan også vere i fliser, flisskum, avrettingsmasse m.m. Det mest vanlege i vårt område er eternittak på eldre gårdsbygg.